Vul die vorm hieronder in en ons sal u terugskakel

’n Trotse tradisie

Hoërskool Waterkloof se jarelange tradisie van puik atletiekprestasies leef voort. Uit Klofieland kom talle nasionale en internasionale kampioene. Yolanda Steyn, Marelize Fouché (Visser), Susan Knox, Burger Lambrechts,  Carel le Roux, Frits Potgieter, Marna Schutte, Nico Grimbeek, Karel Potgieter, Werner Botha, Pieter Smith, Gerlize de Klerk, Claudia Viljoen, Willie de Beer en Divan Engelbrecht het Suid-Afrika al op senior vlak verteenwoordig.

Ons prestasies oor die afgelope 16 jaar (1997 tot 2012) spreek boekdele:

• 13 SA rekords.
• 15 SA senior atlete.
• 34 SA jeug- en junior atlete.
• 286 medaljes op SA-kampioenskappe.
• 402 provinsiale atlete.

Die afgelope agt jaar het sewentien Klofies die land op jeug- en junior vlak verteenwoordig. Hulle is Pieter Smith, Brendon Clement, Ernst Hattingh, Carla Hugo, Gerlize de Klerk, Willie de Beer, Claudine Janse van Rensburg, Claudia Viljoen, Willem le Roux, Junè Roelofse, Monja Goosen, Annika van Huyssteen, Zanri van der Merwe, Melissa Harmse, Ruan Greyling, Somari Els en Reinhard van Zyl. Vanaf 2005 was daar elke keer ten minste twee Klofies wat Suid-Afrika by die Wêreld-Jeugkampioenskap verteenwoordig het. Vanaf 2005 tot 2012 is Klofie-atlete 180 keer vir provinsiale spanne gekies en het hulle 183 medaljes op die SA- Kampioenskap verower, waarvan 102 goue medaljes was.  Klofie-atlete se name verskyn jaarliks op die nasionale ranglyste vir prestasies van die seisoen, asook op die ranglyste vir prestasies van alle tye.

Spanne en byeenkomste

Die skool kies jaarliks ‘n A- en ‘n B-span. Elke span neem aan ’n interhoërbyeenkoms deel. In 2011 het die A- en B-span hulle interhoërbyeenkomste gewen. Dié twee spanne neem jaarliks aan nog sowat agt vriendskaplike byeenkomste deel. Individue wat aan meer byeenkomste wil deelneem, word na ligabyeenkomste in Pretoria, Germiston en Potchefstroom geneem. Daar word ook jaarliks vir Top 10- en Top 12-byeenkomste ingeskryf.

Oefenkamp

Bo en behalwe gereelde oefeninge voor en gedurende die seisoen, word sowat 100 atlete elke Desembervakansie op ‘n oefenkamp by die see geneem. Graad 7-atlete word aangemoedig om saam te gaan en ’n groot groep graad 7’s woon die kamp by. Laerskoolatlete word aangemoedig om reeds tydens die voorseisoen (Augustus) by die oefengroepe in te skakel.

Fasiliteite

Agt fyngrasbane, sintetiese aanlope vir ver- en hoogspring, hoë gehalte apparaat en implimente, spreiligte by die 3000-sitplek pawiljoen, ‘n volledig toegeruste gimnasium, kleedkamers en ‘n onthaallokaal met ’n kombuis, is tot die atlete se beskikking. Atlete wat van ver af kom, kan in die koshuis woon. Daar is vervoergeleenthede vir atlete in Pretoria soggens en smiddae ná oefening na en van die skool. ‘n Fisioterapeut en ’n sportwetenskaplike op die skoolterrein dra ook tot die atlete se skitterende prestasies by.

Afrigting

Afrigters help die atlete wat na die SA-Kampioenskap, internasionale byeenkomste en wêreldkampioenskappe gaan, tot aan die einde van die seisoen.  Daar is vir elke item ’n afrigter.  Sommige afrigters rig ook senior atlete en oud-Klofies af.

Landloop

Ons neem jaarliks aan die NuPower/Tuks-reeks en die Gauteng-Noord Hoërskole Landloopkompetisie deel.  Individuele atlete word aangemoedig om aan die Gauteng-Noordligas deel te neem.

Die volgende landloopatlete is in die Gauteng-Noordlandloopspan ingesluit:  Arnè Verster en Marno du Plessis (seuns O/15), Morné Olivier (seuns O/16), Tarien Prinsloo en Megan Odendaal (dogters O/15) en Janica Labuschagné (dogters O/17). Hulle gaan in September aan die SA-kampioenskap in Amanzimtoti deelneem.

 Kobus Schoeman, voormalige Springbok-hekkiesatleet, is as atletiekkonsultant by die skool aangestel.  Hy beplan die volgende:

• Afrigtingsklinieke: Vlak I-, II- en III-atletiekafrigtingsklinieke sal by die skool aangebied word. Voedingslaerskole se afrigters en hoofde is reeds in kennis gestel. Die kursusse is by Atletiek Suid-Afrika (ASA) geakkrediteer.  Dié kursus sal jaarliks aangebied word en opvolgsessies sal ook aangebied word. Aanbieders: Naellope - Nelmerie Venter, hekkies - Kobus Schoeman, hoogspring - Jonathan Greyvenstein, verspring - Irma Reynecke, driesprong - Danie Cornelius, paalspring - Rian Botha,  gewigstoot - Jannie van der Merwe, diskus - Dup du Preez, spiesgooi - Dreyer Campbell en middel- en langafstande en stap - Willie Vermeulen.
• Beamptekursusse: Vlak I-, II- en III-beamptekursusse sal ook vir dieselfde teikenmark aangebied word. Inligting is reeds tydens onlangse besoeke aan skool- en sporthoofde deurgegee. Kursusaanbieders is Hugo Badenhorst en Willie van Rensburg, internasionale beamptes wat tans op ASA se paneel dien.
• Organiseringskursusse: ‘n Kursus oor die organisering van ‘n atletiekbyeenkoms word beplan. Daar sal afgeskop word met die basiese beginsels oor die aanbied van ‘n interhuisbyeenkoms. Dit sal later uitgebrei word na die aanbied van distriks-, provinsiale en nasionale byeenkomste.
• Oefenbyeenkomste vir laerskole op Hoërskool Waterkloof se velde:   ʼn Byeenkoms se program word in twee dele gedeel en oor twee dae (bv. Woensdae) aangebied.  Dié byeenkomste is nie te lank nie en kan op weeksdae aangebied word.  Laerskool- en sporthoofde is ten gunste van dié byeenkomste.
• Oefenkampe en afrigtingseminare: Gereelde oefenseminare en oefenkampe gaan tydens skoolvakansies deur senior afrigters aangebied word.  Die idee van mentorskap deur senior afrigters word tans ondersoek. 

Oud-Klofie, Willie de Beer, is in die SA-Atletiekspan vir die Olimpiese Spele ingesluit.  Hy het aan die 4 x 400m aflos deelgeneem.

Oefentye: Maandae tot Donderdae 14:15 tot 15:30

Afrigters:

Navrae

Dreyer Campbell

Direkteur:  Atletiek

Skakel die sportburo - 012 347 7707, of stuur 'n e-pos na This e-mail address is being protected from spambots. You need JavaScript enabled to view it

 Voorlopige atletiekdatums vir 2013 

Voorlopige landloopdatums vir 2013

Uitslae vir 2013: 

Interhuis 2013 (Absa-punte en rekords)

Interhuis 2013 (Trofeë)

Atletiekverslag 2012