Rugby

Hoërskool Waterkloof staan as een van die toprugbyskole in Suid-Afrika bekend en lewer verskeie helde op wat vir die Springbokke speel:  Faf de Klerk (skrumskakel),  Rohan Jansen van Rensburg (senter) en Stedman Gans (7’s-rugby). Topafrigters gee aan spelers die geleentheid om hulle talente te ontdek en só te ontwikkel dat hulle moontlik eendag die Groen en Goud oor hulle koppe kan trek.

DOELWITTE
Kloof-rugby beoog om in die volgende drie jaar onder die top 5-rugbyskole in Suid-Afrika te wees om daardeur spelers ‘n beter kans te bied om hulleself te ontdek en te ontwikkel. Met Rhino-rugby as borg van die skool se rugbytoerusting, kan spelers in hulle onderskeie posisies ontwikkel word.

AFRIGTERS

In 2024 is mnr. Dillon Smit as Hoërskool Waterkloof se hoëprestasiebestuurder aangestel. Mnr. Smit het sewe jaar vir die Goue Leeus gespeel en was deel van die span wat in 2019 in die Curriebeker-finaal gespeel het. Hy was ook deel van die NWU-Puk se eerste span wat in 2014 en 2015 die finaal gehaal het. Hy het sy rugbyloopbaan in Amerika (by Houston SaberCats) afgesluit en by Kloof-rugby aangesluit. Mnr. Smit neem leiding by die aanleer van vaardighede, rugbyontwikkeling en Future-Klofies. Hy is ook die eerste span se agterlynafrigter.

Mnr. Cobus van Dyk, sporthoof van Hoërskool Waterkloof, rig saam met mnr. Smit die eerste span af.  Mnr. van Dyk se ondervinding by die Pumas Cravenweek en die Blou Bulle spreek boekdele. Mnr. van Dyk is ook by SA-Skole en Tuks-rugby betrokke.  

Hoërskool Waterkloof se rugbydirekteur, mnr. Lukas Holtzhauzen, het sy afrigtersloopbaan in Limerick, Ierland, afgeskop en was by top skole soos Hoërskool Outeniqua, Paarl Gimnasium en Hoër Landbouskool Oakdale betrokke. Hy was ook by verskeie WP-Cravenweke betrokke. Hy was vir drie jaar die 7’s-afrigter by die Noordwes-Universiteit en Luiperds Rugby-unie. Mnr. Holtzhauzen was vir nege jaar by SWD-rugby betrokke en was ook in 2019 die o. 16-Grant Khomo-afrigter.  Dié span het tweede in 2019 geëindig en het in 2017 in die finaal van die kompetisie gespeel. Mnr. Holtzhauzen is tans die hoofafrigter van die o. 16-Blou Bulle Noordvaal B-span.


Die afrigters by Hoërskool Waterkloof woon jaarliks afrigtingskursusse by om te verseker dat hulle steeds ontwikkel om sodoende die beste afrigters, volgens hulle vermoë, te kan wees. Kloof se afrigters is daarop ingestel om in drie dimensies, naamlik liggaam, siel en gees, af te rig.

DEELNAME
Die jaarlikse derby is hierdie jaar teen AHS. Die A-, B- en C-spanne neem aan die SDC Noordvaalbeker-reeks deel. Hier kan hulle hul staal wys om moontlik vir die Blou Bul-spanne gekies te word. Die eerste span en die Torries (tweede span) neem aan die Noord-Suidtoernooi deel. Verskeie toere word gedurende die Maartvakansie onderneem. Die o. 16A-span neem aan die Paarl Gimnasium-toernooi deel. Die o. 15A-span toer ook na Paarl waar hulle aan die Paarl Boys high-rugbyweek deelneem. Die o. 14A-span toer na George waar hulle aan die Kwagga-rugbytoernooi van Hoërskool Outeniqua deelneem.

Kloof is trots om een van die Top-20 skole te wees wat in Mei na Kimberley toer om aan die Wildeklawer-toernooi deel te neem. Hier verteenwoordig al die A-spanne die skool met trots.

OEFENING
Rugbyproewe, wat gebruik word om groepe van 40 spelers saam te stel, word na afloop van die laaste wedstryd in die seisoen gespeel. Dié spelers begin in September (weeksdae tussen 16:00 en 17:45) met ‘n voorseisoenprogram.  Op Woensdae vind spesialisoefening, wat deur Blou Bul- en UP-spelers aangebied word, vir alle spelers plaas. Daar word op ingooie, skopwerk en vaardighede gefokus.

Gedurende die rugbyseisoen word daar op Maandae, Dinsdae en Donderdae vanaf 14:30 tot 17:30 geoefen en op Woensdae vanaf 15:00 tot 17:00.

KOSTE
Toergeld is nie deel van skoolfonds nie en is vir die onderskeie rugbytoere betaalbaar.

NAVRAE
Lukas Holtzhauzen
lukas.holtzhauzen@klofies.co.za

Future Klofies Ruby

Kontakpersoon: Dillon Smit
Kontakbesonderhede: 012 347 7707

Die Future Klofies rugbyprogram bied aan seuns tussen die ouderdom van 7 en 13 jaar die geleentheid om hul rugbyvaardighede op te skerp.  Dit skep ook geleentheid vir die spelers om hulle sosiale vaardighede te ontwikkel, nuwe vriende te maak en, die belangrikste van alles, om PRET te hê.

RUGBYVAARDIGHEDE

  • Akkurate aangee
  • Hardlooplyne
  • Ondersteunende spel
  • Besluitneming
  • Algemene fiksheid
  • Spanwerk

LEWENSVAARDIGHEDE

  • Konsentrasievaardighede
  • Luistervaardighede
  • Kommunikasievaardighede
  • Selfvertroue
  • Spierontwikkeling
  • Sosiale vaardighede

SESSIES

Sessies bestaan uit:

  • + 10 minute:              Opwarming
  • + 10 minute:              Pret en speletjies
  • + 25 minute:              Rugbyvaardighede
  • + 10 minute:              Afwarming

OORSIG

  • Elke sessie word beplan en ontwerp sodat die seuns se vaardighede verbeter sal word.
  • Sessies is ontwerp om PRET te wees.
  • Aan die einde van die program sal die seuns spesifieke vaardighede bemeester het.

    *  Raadpleeg asb. die d6-Kommunikeerder vir opgedateerde en gereelde inligting i.v.m. datums en wedstryde.

Designed by brandx.mobi